បាត់ដំបង — នៅព្រឹកថ្ងៃសៅរ៍នេះ ឧទ្ធម្ភាគចក្រ ចំនួន២គ្រឿងរបស់កងទ័ពជើងអាកាស កំពុងមមាញឹកដឹកវ៉ាក់សាំងកូវីដ-១៩ AstraZeneca និងសម្ភារៈវេជ្ជសាស្រ្តមួយចំនួនទៀត ទៅកាន់បណ្តាខេត្តចំនួន៦ដែលជាប់នឹងព្រំដែនប្រទេសថៃ ដើម្បីចាក់ដូសជំរុញ ឬដូសទី៣ ដល់កងកម្លាំងជួរមុខ។
ការចាប់ផ្តើមបន្ទាន់នូវយុទ្ធនាការចាក់វ៉ាក់សាំងដូសទី៣ដល់កម្លាំងជួរមុខនេះ គឺធ្វើឡើងក្រោយទទួលបានបទបញ្ជាពីប្រមុខរាជរដ្ឋាភិបាលកម្ពុជា ខណៈខេត្តទាំងនោះជាខេត្តដែលមានបងប្អូនពលករខ្មែរសម្រុកចូលមកកម្ពុជាជាបន្តបន្ទាប់ ហើយកងកម្លាំងមានការប្រឈមខ្ពស់ក្នុងពេលបំពេញការងារ។
តាមការគ្រោងទុក ដំណើរការ នៃការចាក់វ៉ាក់សាំងដូសទី៣ ឬដូសជំរុញ ទៅដល់កម្លាំងជួរមុខ គ្រោងចាប់ផ្តើមនៅថ្ងៃស្អែក ឬយ៉ាងយូរបំផុតនៅថ្ងៃចន្ទខាងមុខ៕
