តាកែវ — ពលរដ្ឋជាង៥០គ្រួសាររស់នៅឃុំទ្រា ស្រុកសំរោង ខេត្តតាកែវ កាលពីពេលថ្មីៗនេះបាននាំគ្នាផ្តិតមេដៃ សុំអន្តរាគមន៍ទៅលោក អ៊ូច ភា អភិបាលខេត្តតាកែវ ក្រោយពីក្រុមហ៊ុនមួយដែលបានការអនុញ្ញាតពីអភិបាលស្រុកអង្គរបូរី កំពុងដឹកដីចាក់លុបប្រឡាយទឹកស្ថិតនៅឃុំពន្លៃ ស្រុកអង្គរបុរី ដែលធ្វើឲ្យស្ទះទឹកសម្រាប់ស្រោចស្រពស្រូវពលរដ្ឋនៅស្រុកសំរោង។
យោងតាមលិខិតសុំអន្តរាគមន៍នោះថា ក្រុមហ៊ុនមួយនោះបានដឹកដីចាក់លុបប្រឡាយរំដោះទឹកនៅភូមិកោះទ្រា ឃុំពន្លៃ ស្រុកអង្គរបុរី ដែលជាប្រឡាយរំដោះទឹកឲ្យប្រជាពលរដ្ឋរស់នៅស្រុកសំរោងទាំងមូល សម្រាប់ពួកគាត់ធ្វើស្រែប្រាំងរាប់សិបហិចតា។
បើតាមពលរដ្ឋថា ប្រឡាយនេះមានប្រវែង១៧៦៧០ម៉ែត្រ និងទទឹង៤ម៉ែត្រ ជម្រៅ២ម៉ែត្រ តភ្ជាប់រវាងស្រុកសំរោងនិងស្រុកអង្គរបុរី ហើយប្រឡាយនេះជាប្រឡាយមេរំដោះទឹកដ៏សំខាន់ដែលមិនអាចខ្វះបាន តែអាជ្ញាធរស្រុកអង្គរបុរី បែរជាអនុញ្ញាតិឲ្យក្រុមហ៊ុនចាក់ដីលុបដោយមិនបានសិក្សាស្វែងយល់ឲ្យច្បាស់លាស់ជាមុនសិននោះទេ។
ពាក់ពន្ធ័ករណីនេះលោក កេត ម៉ៅ អភិបាលស្រុកសំរោងបានថ្លែងថា លោកពិតជាទទួលបានព័ត៍មានពីប្រជាពលរដ្ឋថា មានក្រុមហ៊ុនចាក់ដីលុបប្រឡាយនៅជាប់ព្រំប្រទល់ស្រុកអង្គរបុរី និងស្រុកសំរោងមែន តែគេចាក់ដីលុបនៅភូមិសាស្រ្តស្រុកអង្គរបុរីទេ តែវាមានផលប៉ះពាល់ដល់ពលរដ្ឋស្រុកសំរោងរឿងរំដោះទឹកទាំងរដូវប្រាំងនិងរដូវវស្សា។
លោកថា លោកបានទទួលពាក្យស្នើសុំពីពលរដ្ឋសុំឲ្យឯកឧត្តមអភិបាលខេត្តអន្តរាគមន៍ហើយ តែលោកមិនមានវិធានការបែបណានោះទេ គឺទុកឲ្យឯកឧត្តមអភិបាលខេត្តជាអ្នកសម្រេចទៅចុះ។
ដោយឡែក លោក ឌឹម គឹមសាន្ត អភិបាលស្រុកអង្គរបុរី បានថ្លែងថា លោកពិតជាបានឲ្យច្បាប់ទៅក្រុមហ៊ុនចាក់ដីខាងលើពិតមែន តែលោកចេញច្បាប់ឲ្យចាក់តែទទឹង៤០ម៉ែត្រ និងបណ្តោយ៦០ម៉ែត្រប៉ុណ្ណោះ ហើយរឿងឯកសារ ឬប្លង់ដីសូមសួរទៅលោក ឡេង ខូវ ប្រធានភូមិបាលស្រុកអង្គរបុរីទៅចុះ។
នៅថ្ងៃនេះ យើងមិនអាចទាក់ទងលោក ឡេង ខូវ ដើម្បីបកស្រាយបានទេ។ តែយ៉ាងណាក៏ដោយ ពេលនេះមហាជនចាំមើលថា តើលោកអភិបាលខេត្តនឹងដោះស្រាយយ៉ាងណាចំពោះករណីនេះ ហើយថា តើចៅហ្វាយស្រុកមួយណាដែលបម្រើរាស្រ្តឲ្យប្រាកដ?
