ថ្លែងក្នុងកិច្ចប្រជុំក្រុមការងារបច្ចេកទេសហេដ្ឋារចនាសម្ព័ន្ធ និងសមាហរណកម្មក្នុងតំបន់(IRITWG)តាមប្រព័ន្ធវីដេអូពីចម្ងាយ ដែលធ្វើឡើងកាលពីថ្ងៃទី១៩ ខែសីហា លោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូនបានបញ្ជាក់ថា ពេលនេះក្រសួងបាន និងកំពុងសិក្សាផ្លូវក្រវ៉ាត់ក្រុងទី៤ ខណៈគម្រោងសាងសង់ ផ្លូវល្បឿនលឿន ភ្នំពេញ-បាវិត-ម៉ុកបៃ ព្រំដែនកម្ពុជា-វៀតណាម ក៏កំពុងសិក្សាដូចគ្នា។
សម្រាប់ផ្លូវក្រវ៉ាត់ក្រុងទី៤ បើតាមឲ្យដឹងពីរដ្ឋមន្ត្រីក្រសួងសាធារណការនិងដឹកជញ្ជូន កាលពីពេលកន្លងទៅថា វានឹងជម្រុញកំណើនសេដ្ឋកិច្ចជាតិតាមរយៈការធូរស្បើយនៃចរាចរណ៍ និងសម្រួលដល់បណ្តាញដឹកជញ្ជូនទំនិញចេញ-ចូលទីក្រុងភ្នំពេញ ក៏ដូចជាទៅកាន់បណ្តារខេត្តនានា។
បើតាមមន្រ្តីក្រសួងសាធារណការ និងដឹកជញ្ជូនថា ផ្លូវក្រវាត់ក្រុងទី៤នេះធ្លាប់ត្រូវបានក្រុមហ៊ុនចិនមួយធ្វើការសិក្សា ដោយវាមានប្រវែង១៩៥ គីឡូម៉ែត្រ ឆ្លងកាត់ខេត្តចំនួន៤ គឺខេត្តកំពង់ស្ពី តាកែវ កណ្តាល និងខេត្តព្រៃវែង ដោយកាត់ខេត្តកំពង់ស្ពីចំនួន៣ស្រុក ខេត្តតាកែវចំនួន១ស្រុក ខេត្តកណ្តាល៨ស្រុក និងខេត្តព្រៃវែង២ស្រុក។
សម្រាប់ផ្លូវល្បឿនលឿនភ្នំពេញ-បាវិត វិញ បើតាមការចុះផ្សាយរបស់ក្រសួងសាធារណការ ផ្លូវនេះមានប្រវែងសរុបប្រហែល ១៣៥ គ.ម ដោយត្រូវសាងសង់ជា ០៤គន្លង តួផ្លូវមានទទឹង ២៥,៥ ម៉ែត្រ។ ខ្សែផ្លូវនេះ នឹងចេញពីភ្នំពេញនៅចំណុចផ្លូវខ្សែក្រវ៉ាត់ក្រុងទី៣ កាត់តាមខេត្តកណ្តាល ខេត្តព្រៃវែង និងខេត្តស្វាយរៀង ឆ្ពោះទៅក្រុងបាវិត ព្រំដែនកម្ពុជា-វៀតណាម។
តាមរបាយការណ៍សិក្សារបស់ទីភ្នាក់ងារសហប្រតិបត្តិការអន្តរជាតិជប៉ុន (JICA) ផ្លូវល្បឿនលឿននេះ ជាប្រភេទផ្លូវលើអាកាស (Viaduct) ប្រវែងប្រហែល ១២ គ.ម មានលូប្រអប់ (Box Culvert) ប្រវែងប្រហែល ២៨,៤ គ.ម និងជាប្រភេទ ផ្លូវលើកកម្ពស់ (Embankment) ប្រវែងប្រហែល ៨៥,៨ គ.ម។
ផ្លូវល្បឿនលឿន ភ្នំពេញ-បាវិត មានផ្លូវបំបែក ប្តូរទិស (Inter-Change) ចំនួន ៧ កន្លែង កន្លែងឈប់សម្រាក ៦កន្លែង និងច្រកទ្វារ ព្រំដែនថ្មីចំនួន ០១ ផងដែរ៕