យោងតាមការចុះផ្សាយរបស់ក្រុមប្រឹក្សាអភិវឌ្ឍន៍កម្ពុជា នៅថ្ងៃនេះបានបញ្ជាក់ថា គណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា បានសម្រេចចេញវិញ្ញាបនបត្រចុះបញ្ជីជាស្ថាពរ ជូនដល់ក្រុមហ៊ុនចំនួន៧ ក្នុងបើករោងចក្រ ក៏ដូចជាកសិដ្ឋាននៅក្នុងប្រទេសកម្ពុជា ក្នុងនោះក៏មានក្រុមហ៊ុនមួយនឹងបើករោងចក្រកែច្នៃផ្លែឈើ ក្នុងទុនវិនិយោគប្រមាណជាង ១១លានដុល្លារអាមេរិកផងដែរ។
រោងចក្រកែច្នៃផ្លែឈើ គ្រោងនឹងបង្កើតនៅស្រុកឱរ៉ាល់
យោងតាមសំណើ ក្រុមហ៊ុន CAMBODIAN XING CAN SHI PIN CO., LTD. គ្រោងបង្កើតរោងចក្រកែច្នៃផ្លែឈើ ធ្វើជាដំណាប់ស្វាយ, ម្នាស់, មៀន, ខ្នុរ និងស្វាយចន្ទី ដែលមានទីតាំងវិនិយោគស្ថិតនៅភូមិតាំងស្រឹង ឃុំសង្កែសាទប ស្រុកឱរ៉ាល់ ខេត្តកំពង់ស្ពឺ ក្នុងទុនវិនិយោគប្រមាណ ១១,២លានដុល្លារអាមេរិក និងអាចបង្កើតការងារបានចំនួន ១៥៤នាក់។
គម្រោងបង្កើតរោងចក្រកែច្នៃផ្លែឈើនៅកម្ពុជានេះ ត្រូវបានសាទរ ដោយប្រជាកសិករភាគច្រើន បន្ទាប់ពីរយៈពេលចុងក្រោយនេះ កម្ពុជាបានជួបនូវវិបត្តិនាំចេញផ្លែឈើ ពិសេសគឺផ្លែមៀនប៉ៃលិន រហូតដល់ប្រមុខរាជរដ្ឋាភិបាលបានចេញអន្តរាគមន៍ ដោយបញ្ជាឲ្យធ្វើការប្រមូលទិញពីប្រជាកសិករទាំងអស់ ក្រោយពីប្រទេសថៃបានបិទព្រំដែនមិនទទួលទិញផ្លែមៀនពីប្រទេសកម្ពុជានោះ៕
