រាជរដ្ឋាភិបាលកម្ពុជា នៅថ្ងៃនេះពុធនេះ បានប្រកាសដាក់ចេញនូវគោលនយោបាយចាក់វ៉ាក់សាំងកូវីដ១៩ ដូសជំរុញ សម្រាប់ប្រជាពលរដ្ឋទាំងអស់ ដែលមានអាយុចាប់ពី១២ឆ្នាំឡើង ដោយផ្តើមពីខែសីហា ឆ្នាំ២០២១នេះ រហូតដល់កំឡុងពាក់កណ្តាលឆ្នាំ២០២២។
ការចាក់វ៉ាក់សាំងដូសជំរុញនឹងចាត់ផ្តើមពីខែនេះ រហូតដល់ពាក់កណ្តាលឆ្នាំ២០២២
ការចាក់ដូសជំរុញនេះ នឹងធ្វើឡើងដោយគោលការណ៍ស្ម័គ្រចិត្ត តែរាជរដ្ឋាភិបាលលើកទឹកចិត្តដល់ពលរដ្ឋដែលមានលក្ខណៈសមស្របតាមលក្ខខណ្ឌបច្ចេកទេស មកទទួលយកវ៉ាក់សាំងដូសជំរុញនេះឲ្យបានគ្រប់ៗគ្នា ដើម្បីជួយបង្កើនភាពឆ្លើយតប នៃអង្គបដិបក្ខ នៃប្រព័ន្ធការពារក្នុងខ្លួនឲ្យកាន់តែប្រសើរឡើង ប្រឆាំងនឹងមេរោគកូវីដ១៩ ជាពិសេស ទប់ទល់នឹងមេរោគបំប្លែងខ្លួនថ្មីប្រភេទដែលតា និងប្រភេទបំប្លែងខ្លួនថ្មីផ្សេងទៀត។
សម្រាប់ការចាក់វ៉ាក់សាំងដូសជំរុញនេះ រាជរដ្ឋាភិបាលនឹងផ្តើមចេញពីក្រុមមន្រ្តីសុខាភិបាល និងមន្រ្តីបម្រើការជួរមុខ ក្នុងការប្រយុទ្ធនឹងជំងឺកូវីដ១៩ ដោយផ្តើមពីតំបន់ដែលមានហានិភ័យខ្ពស់, ប្រជាពលរដ្ឋដែលមានអាយុចាប់ពី ៦០ឆ្នាំឡើងទៅ និងប្រជាពលរដ្ឋដែលមានប្រព័ន្ធការពាររាងកាយខ្សោយ មុននឹងបន្តទៅចាក់ជូនប្រជាពលរដ្ឋទូទៅ ស្របតាមអភិក្រម «ផ្ការីក» ដោយផ្តើមចេញពីរាជធានីភ្នំពេញ, ខេត្តកណ្តាល និងបន្តទៅកាន់បណ្តាខេត្តនានាទូទាំងប្រទេស។
យោងតាមចំណុចមួយ នៃគោលនយោបាយចាក់វ៉ាក់សាំងកូវីដ១៩ដូសជំរុញនេះ វ៉ាក់សាំងដែលអាចនឹងត្រូវបានប្រើប្រាស់សម្រាប់ជាដូសជំរុញ គឺអាចជាវ៉ាក់សាំងប្រភេទ Sinopharm និង Sinovac ព្រោះវ៉ាក់សាំងទាំងពីរនេះ ត្រូវបានប្រើប្រាស់លើសលប់លើប្រជាពលរដ្ឋកម្ពុជា ហើយក្រុមការងារជំនាញ ក៏បានរកឃើញថា វាអាចមានប្រសិទ្ធភាពចំពោះអ្នកដែលបានចាក់វ៉ាក់សាំងមូលដ្ឋានប្រភេទ AstraZeneca ឬ Johnson & Johnson ផងដែរ៕
