ក្រោយពីមានការស្នើសុំអន្តរាគមន៍ជាច្រើនលើក ពាក់ពន្ធនឹងករណីជម្លោះវិនិយោគរវាងប្រជាពលរដ្ឋជាង ៤០០នាក់ និងក្រុមហ៊ុន Gold FX Investment នៅថ្ងៃទី១៤ កញ្ញា សម្តេចតេជោ ហ៊ុន សែន នាយករដ្ឋមន្រ្តី នៃកម្ពុជា បានឆ្លើយ និងផ្តល់អនុសាសន៍សម្រាប់ករណីនេះ ដោយប្រាប់ឲ្យភាគីទាំងពីរសម្រុះសម្រួលគ្នា មុននឹងដាក់ពាក្យប្តឹងទៅតុលាការ។
សម្តេចតេជោ ហ៊ុន សែន លើកឡើងក្នុងសារឆ្លើយតបនឹង Comment អ្នកប្រើប្រាស់ facebook ឈ្មោះ «លីន លីន» ថា «ដោយសារបងប្អូន បានចូលមកនិយាយប្រាប់ខ្ញុំច្រើនដងហើយ ដែលល្មមដល់ពេលខ្ញុំត្រូវឆ្លើយតប ដោយខ្លីថា សូមបងប្អូនបន្តសម្រុះសម្រួលគ្នា ព្រោះបងប្អូនស្ម័គ្រចិត្តរកស៊ីជាមួយគ្នា។ ក្នុងករណីរកការស្រុះស្រួល មិនបាន សុំដាក់ពាក្យបណ្តឹងទៅកាន់តុលាការ»។
បើតាមអ្នកប្រើហ្វេសប៊ុក ឈ្មោះ «លីន លីន» ថា «មកដល់ពេលនេះ យើងខ្ញុំទាំងអស់ប្រមាណជាង ៤០០នាក់ គឺជាវិនិយោគិន និងជាជនរងគ្រោះ ដែលបានដាក់ប្រាក់វិនិយោគ ក្នុងក្រុមហ៊ុន ហ្គោល អេហ្វអិកស៍ អ៊ិនវេសម៉ិន (GOLD FX INVESTMENT CO.,LTD) នៅរសាត់ អណ្តែត តែលតោល វេទនាផ្លូវកាយផ្លូវចិត្ត ដោយមិនទាន់បានទទួលដំណោះស្រាយសំណងប្រាក់ដើមសមស្របពីក្រុមហ៊ុនខាងលើនេះ នៅឡើយទេ»។
សូមរម្លឹកថា កាលពីថ្ងៃទី២៩ ខែមីនា ឆ្នាំ២០២១ ក្រុមហ៊ុន Gold FX Investment Co.,Ltd បានចេញសេចក្តីជូនដំណឹង អំពី ការផ្អាកដំណើរការជាបណ្តោះអាសន្ននូវប្រតិបត្តិការទាំងស្រុងតែម្តង។ មូលហេតុ ដោយសំអាងថា គណៈគ្រប់គ្រងមួយចំនួន នៅក្នុងក្រុមហ៊ុន បានកិបកេងប្រវ័ញ្ចប្រាក់របស់ក្រុមហ៊ុន និងប្រាក់របស់អតិថិជនយ៉ាងច្រើន។
យ៉ាងណាក៏ដោយ កាលពីថ្ងៃទី៣១ ខែឧសភា ឆ្នាំ២០២១នេះ ក្រុមវិនិយោគិន ដែលបណ្តាក់ទុនវិនិយោគ តាមរយៈក្រុមហ៊ុន ហ្គោល អេហ្វ អិកស៍ អ៊ិនវេសម៉ិន (GOLD FX INVESTMENT CO.,LTD) រឺហៅកាត់ថា ជីអ្វេហអិក (GFX) ដែលជាក្រុមហ៊ុនភា្នក់ឈ្មួញជើងសារឧបករណ៍និស្សន្ទ បានប្រមូលផ្តុំទាមទារនូវការបាត់បង់ប្រាក់ពីគណនីវិនិយោគជាមួយក្រុមហ៊ុននេះ ដោយមានចាប់ពីរាប់ពាន់ រហូតដល់រាប់ម៉ឺនដុល្លារ៕
