តាកែវ – មិនបានប៉ុន្មានថ្ងៃផង ក្រោយពីលោក អ៊ូច ភា អភិបាលខេត្តតាកែវ ប្រកាសនៅមុខក្រុមអាជីវករថា លោកពុំដែលបានអនុញ្ញាតឲ្យមានការសង់ផ្សារតាកែវឡើងវិញនោះ ស្រាប់តែបែកធ្លាយឯកសារជាច្រើនសន្លឹក ដែលបង្ហាញថា លោក អ៊ូច ភា បានបោះត្រាអនុញ្ញាតឲ្យឈ្មួញធ្វើការវិនិយោគសាងសង់ផ្សារតាកែវឡើងវិញ ខណៈអាជីវករមួយភាគធំកំពុងខ្វល់រឿងអត់អង្ករច្រកឆ្នាំង ហើយឈ្មួញមកលក់តូបក្នុងតម្លៃរាប់ម៉ឺនដុល្លារឲ្យពួកគាត់ទៀតនោះ។
ប្លង់ផ្សារតាកែថ្មី ដែលគ្រោងសាងសង់
ក្នុងលិខិត២ដាច់ដោយឡែកពីគ្នា ដោយមួយជាលិខិតក្រសួងសេដ្ឋកិច្ច និងហិរញ្ញវត្ថុ និងមួយទៀតជាលិខិតអនុញ្ញាតឲ្យមានការសាងសង់បោះត្រាយល់ព្រមដោយលោក អ៊ូច ភា អភិបាលខេត្តតាកែវ បានបង្ហាញថា ផ្សារតាកែវ ដែលមានទីតាំងស្ថិតនៅភូមិថ្នល់បែក សង្កាត់រការក្រៅ ក្រុងដូនកែវ ត្រូវបានស្នើធ្វើការវិនិយោគ កាលពីចុងខែឧសភា ឆ្នាំ២០២១ ដោយមានឈ្មោះ ប្រាក់ ចាន់រដ្ឋា ជាម្ចាស់គម្រោង ហើយក៏ត្រូវបានអភិបាលខេត្តតាកែវ បោះត្រា យល់ព្រមឲ្យមានការសាងសង់ហើយដែរ។
លិខិតអនុញ្ញាតឲ្យមានការសាងសង់
ដោយសារតែមានការអនុញ្ញាតនេះហើយ ទើបក្រុមឈ្មួញចាប់ផ្តើមធ្វើការលក់តូបផ្សារដែលគេបានគេបានបង្កើតរាប់រយតូប ដោយតាមអាជីវករខ្លះថា តម្លៃតូបនោះគ៏មានតម្លៃថ្លៃ ដោយ១តូបមានពី ១ម៉ឺន៥ពាន់ដុល្លារ រហូតដល់ទៅ ៣ម៉ឺនដុល្លារក៏មាន ទៅតាមទីតាំង។
ប្លង់តូបដែលឈ្មួញលក់ឲ្យអាជីវករ
ព្រោះតែអាជីវករពុំមានប្រាក់សម្រាប់ទិញតូបដែលមានតម្លៃថ្លៃ ខណៈស្ថានភាពសេដ្ឋកិច្ចកំពុងតែដុនដាបនោះហើយ ទើបកាលពីចុងខែកញ្ញា ក្រុមអាជីវករផ្សារតាកែវរាប់រយនាក់ បានលើកគ្នាមកតវ៉ាដល់ខាងមុខសាលាខេត្តតាកែវ ប៉ុន្តែត្រូវបានបំបែកដោយអាជ្ញាធរ ក្រោមហេតុផលខុសវិធានសុខាភិបាលស្តីពីការទប់ស្ការជំងឺកូវីដ១៩ ដោយមិនឲ្យមានការជួបជុំ។
ក្រុមអាជីវករផ្សារតាកែវ លើកគ្នាតវ៉ានៅមុខសាលាខេត្ត
យ៉ាងណាក៏ដោយ នៅថ្ងៃទី១៤ តុលា កន្លងទៅថ្មីៗនេះ ក្រុមអាជីវករបានសម្រុកចូលមកដល់ខាងក្នុងសាលាខេត្តដើម្បីជួបលោកអភិបាលខេត្តតាកែវដោយផ្ទាល់ ហើយនៅចំពោះមុខក្រុមអាជីវករទាំងនោះ លោក អ៊ូច ភា បានអះអាងថា លោកមិនដែលបានចេញលិខិតអនុញ្ញាតឲ្យមានការសាងសង់វិនិយោគផ្សារតាកែវនោះទេ តែឥឡូវ ឯកសារមួយបានបង្ហាញថា លោកអភិបាលខេត្តបានសម្រេចអនុញ្ញាតឲ្យមានការសាងសង់ផ្សារតាកែវតាំងតែពីកំឡុងខែឧសភា ឆ្នាំ២០២១មកម្ល៉េះ។
អាជីវករលើកគ្នាសុំឲ្យអភិបាលខេត្តលុបចោលការសង់ផ្សារតាកែវថ្មី
ចំពោះករណីនេះ លោក អ៊ូច ភា អភិបាលខេត្តតាកែវ បានថ្លែងដោយថា លោកមិនបានចេញលិខិតអនុញ្ញាតនោះទេ ហើយថា ប្លង់ខាងលើនោះ គឺជាប្លង់ស្ថាបត្យកម្ម វាមិនមែនជាលិខិតអនុញ្ញាតនោះឡើយ។
គួរបញ្ជាក់ដែរថា ក្នុងមួយរយៈពេលចុងក្រោយនេះ ខេត្តតាកែវ បានកើតមានរឿងមិនប្រក្រតីជាច្រើន តួរយ៉ាងដូចជាករណីចាក់ដីលុបបឹងតាកែវយកដីធ្វើកម្មសិទ្ធិ ការកាយរណ្តៅដីក្នុងបឹងតាកែវ រហូតដល់មានការចេញលិខិតពីអង្គភាពប្រឆាំងអំពើពុករលួយ ក៏ដូចជាការវិនិយោគផ្សារណាត់ ដែលតាមក្រុមប្រជាពលរដ្ឋខ្លះថា ជាវិនិយោគរបៀបធ្វើនំអត់ម្សៅជាដើម៕
