ភ្នំពេញ : លោក ជាម យៀប ប្រធានគណៈកម្មការសេដ្ឋកិច្ច ហិរញ្ញវត្ថុ ធនាគារ និងសវនកម្ម នៃរដ្ឋសភា នឹងក្លាយជាអនុប្រធានទី១រដ្ឋសភាជំនួសកន្លែង លោក ងួន ញ៉ិល ដែលទទួលមរណភាព។ នេះបើតាម លោក ឡេង ប៉េងឡុង អគ្គលេខាធិការរដ្ឋសភា និងជាអ្នកនាំ ពាក្យរដ្ឋសភា។
លោក ឡេង ប៉េងឡុង បានប្រាប់ក្រុមអ្នករាយការណ៍ព័ត៌មាននៅថ្ងៃទី១៥ ខែវិច្ឆិកា ឆ្នាំ២០២១នេះថា លោក ជាម យៀប ត្រូវបានគណបក្សប្រជាជនកម្ពុជា ស្នើសុំធ្វើជាអនុប្រធានទី១រដ្ឋសភា ជំនួសកន្លែងលោក ងួន ញ៉ិល ដែលបានទទួលមរណភាព ។
លោកបញ្ជាក់ថា «ឯកឧត្តម ជាម យៀប ពិតជាត្រូវជំនួសកន្លែង ឯកឧត្តម ងួន ញ៉ិល ពិតមែន ។ ត្រឹមត្រូវ យើងនឹងធ្វើតាមនីតិវីធីរដ្ឋសភា ពីព្រោះថា ជាសំណើ របស់គណបក្សប្រជាជនកម្ពុជា»។
លោក ឡេង ប៉េងឡុងថា ការទទួលតួនាទី អនុប្រធានទី១ រដ្ឋសភា នឹងធ្វើឡើងក្នុងសម័យប្រជុំពេញអង្គរដ្ឋសភា នៅពេលខាងមុខ បន្ទាប់ពីគណៈកម្មាធិការអចិន្ត្រៃយ៍ ប្រជុំកំណត់ពេលវេលារួច ៕