ភ្នំពេញ – ក្នុងកិច្ចប្រជុំថ្នាក់ដឹកនាំក្រសួងសាធារណការ និងដឹកជញ្ជូនពិនិត្យមើលវឌ្ឍនភាពការងារកាលពីព្រឹកថ្ងៃពុធ (០៥ មករា) លោក ស៊ុន ចាន់ថុល រដ្ឋមន្រ្តីក្រសួងសាធារណការ បានឲ្យដឹងថា លោកបានស្នើទៅកម្មវិធីអភិវឌ្ឍន៍របស់អង្គការសហប្រជាជាតិ (UNDP) រួចហើយ ដើម្បីឲ្យជួយបង្កើតស្ថានីយសាកថ្មយានយន្តចំនួន៥នៅកម្ពុជា។
បើតាមលោករដ្ឋមន្រ្តី ស្ថានីយសាកថ្មចំនួនប្រាំទីតាំងដែលគ្រោងនឹងបង្កើតនោះ ទីតាំងទី១ស្ថិតនៅទីស្តីការក្រសួង និងទីតាំងបួនកន្លែងទៀតស្ថិតនៅតាមបណ្ដារាជធានី-ខេត្តនានា។
ការបង្កើតឲ្យមានទីតាំងសាកថ្មនេះ គឺដើម្បីចាប់ផ្ដើមជំរុញការប្រើប្រាស់យានយន្តដើរដោយថាមពលអគ្គិសនី។
ជាមួយគ្នានេះ ក្រសួងក៏កំពុងស្វែងរកថវិកាទិញរថយន្តដើរដោយថាមពលអគ្គិសនីចំនួនពីរគ្រឿង ដើម្បីជាការនាំមុខ និងជាការបង្ហាញថា ក្រសួងកំពុងប្រើប្រាស់យានយន្ត ដែលដើរដោយថាមពលអគ្គិសនីផងដែរ។
ពាក់ព័ន្ធនឹងការសាងសង់ស្ថានីយ៍សាកថ្មនេះផងដែរ បើតាម លោក ហ៊ាង សុទ្ធាយុត្តិ មន្រ្តីនាំពាក្យក្រសួងសាធារណការ ប្រាប់បណ្តាញសារព័ត៌មានក្នុងស្រុកកាលពីពេលថ្មីៗនេះ បានបញ្ជាក់ថា សម្រាប់តាមបណ្តាខេត្ត ស្ថានីយ៍សាកថ្មនេះ អាចនឹងតម្លើងនៅខេត្តបាត់ដំង និងខេត្តសៀមរាប ហើយចំពោះការប្រើប្រាស់ឬសាករថយន្ត អាចនឹងត្រូវគិតប្រាក់ ប៉ុន្តែមិនគិតក្នុងតម្លៃខ្ពស់ខ្លាំងនោះទេ។ ការគិតប្រាក់នេះ ក៏ព្រោះតែរដ្ឋក៏ត្រូវចំណាយលើថ្លៃអគ្គិសនីផងដែរ៕