ភ្នំពេញ – នៅល្ងាចថ្ងៃទី៧ ខែកុម្ភៈ ឆ្នាំ២០២២ សម្តេចតេជោ ហ៊ុន សែន នាយករដ្ឋមន្រ្តី នៃកម្ពុជា បានបង្ហោះសារនៅលើបណ្តាញសង្គម ដោយសុំអធ្យាស្រ័យចំពោះការលើកឡើងដោយភ័ន្តច្រឡំថា ជនជាតិអូស្រ្តាលីដែលសម្តេចបានស្នើរទៅមេដឹកនាំមេយ៉ាន់ម៉ា ត្រូវបានដោះលែងនោះ ប៉ុន្តែជាក់ស្តែងជនជាតិអូស្រ្តាលីរូបនោះនៅមិនទាន់បានដោះលែងនៅឡើយទេ។
“ព្រឹកមុិញខ្ញុំបានលើកឡើងអំពីការដោះលែងជនជាតិអូស្ត្រាលីដែលខ្ញុំបានស្នើរសុំមេដឹកនាំយោធាមីយ៉ាន់ម៉ា។ តាមការជាក់ស្តែងជនជាតិអូស្ត្រាលីនេះ មិនទាន់ទទួលបានការដោះលែងនៅឡើយទេ។ ការភន្ត័ច្រឡំនេះបណ្តាលមកពីខ្ញុំទទួល បានព័ត៌មានខុសដែលខ្ញុំសូមអាធ្យាស្រ័យលើកំហុសដោយអចេតនាមួយនេះ”
– សម្តេច ហ៊ុន សែន
សូមបញ្ជាក់ថា នៅក្នុងពិធីសម្ពោធផ្លូវជាតិលេខ៧ ពីខេត្តក្រចេះទៅខេត្តស្ទឹងត្រែង នៅព្រឹកថ្ងៃទី៧ ខែកុម្ភៈ ឆ្នាំ២០២២ សម្តេចតេជោ ហ៊ុន សែន នាយករដ្ឋមន្រ្តី នៃកម្ពុជា បានលើកឡើងថា របបសឹកភូមាយល់ព្រមដោះលែងសាស្ត្រាចារ្យម្នាក់សញ្ជាតិអូស្ត្រាលីដែលជាមនុស្សរបស់លោកស្រី អង់សាន ស៊ូជី ក្រោយពីសម្តេចបានស្នើទៅលោក មិនអ៊ុង ឡាំង នៅក្នុងដំណើរទស្សនកិច្ចនៅភូមាកាលពីដើមខែមករា។
សម្តេច ហ៊ុន សែន បានអះអាងទៀតថា កម្ពុជាក្នុងនាមប្រធានអាស៊ាន ដែលសម្របសម្រួលចំពោះបញ្ហាមីយ៉ាន់ម៉ា គឺទទួលបានការគាំទ្រ ច្រើនជាងការរិះគន់ ។ ហើយថា ជម្លោះនយោបាយនៅភូមាដែលកើតមានរាប់ទស្សវត្សមកនេះ គឺមិនដោះស្រាយចប់ត្រឹមតែក្នុងរយៈខ្លី ឬក្នុងពេលដែលកម្ពុជាធ្វើជាប្រធានអាស៊ាននេះឡើយ៕