ប្រមុខការពារជាតិ សម្តេចពិជ័យសេនា ទៀ បាញ់ បានមានប្រសាសន៍ប្រាប់បណ្តាញសារព័ត៌មានក្នុងស្រុកកាលពីរសៀលថ្ងៃម្សិលមិញថា នាវាកងទ័ពស្វ័យការពារជប៉ុន នឹងចូលសុំចតនៅកំពង់ផែកំពង់ផែរាម ខេត្តព្រះសីហនុ ដើម្បីទស្សនកិច្ចនៅទីនោះ និងជួបសម្តែងការគួរសមជាមួយមេបញ្ជាការមូលដ្ឋានសមុទ្រនៅរាមផងដែរ។ ហើយការទៅទស្សនានៅកំពង់ផែរាមនេះ វាមិនមែនជារឿងរឿងសម្ងាត់ទេ។
នាវាស្វ័យការពារជប៉ុនចំនួនពីរគ្រឿងប្រចាំតំបន់ឥណ្ឌូ-ប៉ាស៊ីហ្វិក គ្រោងនឹងចូលចតនៅកំពង់ផែស្វយ័ត ក្រុងព្រះសីហនុ ចាប់ពីថ្ងៃទី១៤-១៧ ខែមីនា ឆ្នាំ២០២២ ដើម្បីសម្តែងការគួរសម និងបំពេញទស្សនកិច្ចជាមិត្តភាពនៅកម្ពុជា និងជាការរំលឹកអបអរសាទខួបលើកទី៣០ នៃកិច្ចសហប្រតិបត្តិការរក្សាសន្តិភាពរបស់កងទ័ពស្វ័យការពារជប៉ុននៅក្នុងប្រទេសកម្ពុជា។
មន្ត្រីកងទព័ជើងទឹកកម្ពុជា បានឱ្យដឹងថា ក្នុងពេលបំពេញទស្សនកិច្ចនៅកម្ពុជា ប្រតិភូនាវាស្វយការពារជប៉ុននឹងជួបសម្តែងការគួរសមជាមួយប្រមុខរាជរដ្ឋាភិបាលកម្ពុជា សម្តេចអគ្គមហាសេនាបតីតេជោហ៊ុន សែន ផងដែរ។
សូមបញ្ជាក់ថា នាវាទី១ ឈ្មោះ URAGA – 463 ជាប្រភេទនាវាប្រឆាំងមីន មានបណ្ដោយ ១៤១ម ទទឹង ២២ម ជម្រៅទឹក ៥.៤ម មានទំងន់ផ្ទុក ៥.៦៥០តោន និងមាននាវិកចំនួន ១២៦នាក់។ នាវាទី២ ឈ្មោះ HIRADO – 305 មានបណ្ដោយ ៦៧ម ទទឹង ១១ម ជម្រៅទឹក ២.៧ម មានទំងន់ផ្ទុក ៦៩០តោន និងមានក្រុមចំនួន ៥៤នាក់។
នាវាទាំង២គ្រឿង ដឹកនាំបញ្ជារួមដោយលោក Noguchi Yasushi មេបញ្ជាការកងពលធំទី១ បោសសំអាតមីន ប្រចាំតំបន់ឥណ្ឌូប៉ាស៊ីហ្វិក៕