ភ្នំពេញ – ការកំណត់តម្លៃប្រេងលក់រាយតាមស្ថានីយ៍ដែលត្រូវបានធ្វើជារៀងរាល់១៥ថ្ងៃម្តង ពេលនេះក្រសួងពាណិជ្ជកម្មបានសម្រេចធ្វើការផ្លាស់ប្តូរមករយៈពេល១០ថ្ងៃម្តងវិញ ។
លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម បានបញ្ជាក់ថា «ក្រសួងបានបើកកិច្ចប្រជុំជាមួយក្រសួងដែលពាក់ព័ន្ធដូចជា ក្រសួងហិរញ្ញវត្ថុ ក្រសួងរ៉ែ និងថាមពល និងផ្នែកឯកជន អ្នកដែលចែកចាយប្រេងឥន្ធនៈ និងបានឯកភាពគ្នាគាំទ្រនូវវិធានការរបស់រាជរដ្ឋាភិបាល ដែលពីមុនមកមាន១៥ថ្ងៃនៃការដាក់តម្លៃ ជូនប្រជាពលរដ្ឋ ជាពិសេសអ្នកដែលចែកចាយកុំឱ្យលើសពីតម្លៃហ្នឹង ប៉ុន្តែល្ងាចនេះ ខ្ញុំនឹងចុះហត្ថលេខា សុំសេចក្តីអនុញ្ញាតពីរដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ដើម្បីផ្សព្វផ្សាយក្នុងរយៈ ពេល១០ថ្ងៃម្ដង មិនមែន១៥ថ្ងៃទៀតទេ ដើម្បីឱ្យឆាប់មានការផ្លាស់ប្ដូរប្រែប្រួលនូវតម្លៃ»។
រដ្ឋមន្ត្រីក្រសួងពាណិជ្ជកម្ម អះអាងថា ការផ្លាស់ប្ដូរការជូនដំណឹងនេះ ជាវិធានការបឋមបំផុត ដើម្បីផ្ដល់ជូនភាពឈ្នះឈ្នះដល់អ្នកប្រើប្រាស់ប្រេងឥន្ធនៈ និងវិស័យឯកជនដែលចែកចាយប្រេងឥន្ធនៈ ដោយសារតែបច្ចុប្បន្ននេះ តម្លៃនៃប្រេងឥន្ធនៈ មានការប្រែប្រួលឡើងចុះលឿន។
បើតាមរដ្ឋមន្ត្រីក្រសួងពាណិជ្ជកម្ម តម្លៃប្រេងមិនទាន់ហក់ឡើងថ្លៃពេកនោះទេ ប៉ុន្តែអាចនឹងឡើងថ្លៃ នៅពេលឆាប់ៗនេះ ដែលកើតចេញពីការដាក់ទណ្ឌកម្មសេដ្ឋកិច្ចលើរុស្ស៊ី ដោយសារជម្លោះរវាងរុស្ស៊ី និងអ៊ុយក្រែន ខណៈដែលប្រទេសរុស្សុីជាអ្នកផលិតប្រេងដ៏ធំមួយ៕
