ក្រសួងធនធានទឹក និងឧតុនិយម បានឱ្យដឹងថា ចាប់ពីចុងខែខែមីនា ដល់ដើមខែមេសា ប្រទេសកម្ពុជានឹងទទួលឥទ្ធិពលសម្ពាធទាប ពីសមុទ្រចិនខាងត្បូង និងឥទ្ធិពលទ្រនុងសម្ពាធខ្ពស់ ពីប្រទេសចិន ក្នុងកម្រិតបង្គួរ ដែលបង្កឱ្យមានភ្លៀងធ្លាក់ រាយប៉ាយ ក្នុងកម្រិតពីមធ្យមទៅច្រើន ជាមួយផ្គរ រន្ទះ និងខ្យល់កន្ត្រាក់។
នៅក្នុងសេចក្តីជូនដំណឹង បានសរសេរថា ពីថ្ងៃទី៣០ ខែមីនា ដល់ថ្ងៃទី១ ខែមេសា ព្រះរាជាណាចក្រកម្ពុជា ទទួលឥទ្ធិពលសម្ពាធទាបសកម្ម ដែលនឹងកើតមានឡើង នៅសមុទ្រចិនខាងត្បូង ក្បែរភាគខាងត្បូង ប្រទេសវៀតណាម។ ពីថ្ងៃទី២ ដល់ ៥ ខែមេសា កម្ពុជាទទួលឥទ្ធិពលទ្រនុងសម្ពាធខ្ពស់ ពីប្រទេសចិន ក្នុងកម្រិតបង្គួរ។
ស្ថានភាពបែបនេះ នឹងធ្វើឲ្យបណ្តាខេត្ត នៅតំបន់វាលទំនាបកណ្តាល មានសីតុណ្ហភាព អប្បបរមាពី ២៣ ទៅ ២៦ អង្សាសេ សីតុណ្ណភាព អតិបរមា មានពី ៣១ ទៅ ៣៤ អង្សាសេ។ ពីថ្ងៃទី៣០ ខែមីនា ដល់ថ្ងៃទី២ ខែមេសា អាចមានភ្លៀងធ្លាក់ ក្នុងកម្រិតពីមធ្យមទៅច្រើន លាយឡំជាមួយផ្គរ រន្ទះ និងខ្យល់កន្ត្រាក់។ តែចាប់ពីថ្ងៃទី៣ ទៅ ៥ ខែមេសា បរិមាណភ្លៀង នឹងចុះខ្សោយទៅវិញ ទន្ទឹមនោះ សីតុណ្ហភាព អប្បបរមា ក៏ចុះត្រជាក់បន្តិច មកវិញដែរ។
សម្រាប់បណ្តាខេត្តជាប់ជួរភ្នំដងរែក និងខ្ពង់រាបឦសាន សីតុណ្ហភាព អប្បបរមាពី ២៣ ទៅ ២៦ អង្សាសេ សីតុណ្ណភាព អតិបរមា មានពី ៣១ ទៅ ៣៤ អង្សាសេ។ នៅអំឡុងពី ថ្ងៃទី៣០ ខែមីនា ដល់ថ្ងៃទី២ ខែមេសា អាចមានភ្លៀងធ្លាក់ ក្នុងកម្រិតពីមធ្យមទៅច្រើន លាយឡំទៅដោយផ្គរ រន្ទះ និង ខ្យល់កន្ត្រាក់។ តែពីថ្ងៃទី៣ ដល់ ៥ ខែមេសា បរិមាណទឹកភ្លៀង នឹងចុះខ្សោយ ទន្ទឹមនោះ សីតុណ្ហភាព អប្បបរមា ក៏ចុះត្រជាក់បន្តិចបន្ថែមទៀត។
តំបន់មាត់សមុទ្រ សីតុណ្ហភាព អប្បបរមាពី ២២ ទៅ ២៥ អង្សាសេ សីតុណ្ណភាព អតិបរមា មានពី ៣០ ទៅ ៣២ អង្សាសេ។ នៅអំឡុងពីថ្ងៃទី៣០ ខែមីនា ដល់ថ្ងៃទី២ ខែមេសា អាចមានភ្លៀងក្នុងកម្រិត ពីមធ្យមទៅច្រើន លាយឡំទៅដោយផ្គរ រន្ទះ និង ខ្យល់កន្ត្រាក់ ។ តែពីថ្ងៃទី៣ ដល់ថ្ងៃទី៥ ខែមេសា បរិមាណភ្លៀង នឹងចុះខ្សោយទៅវិញ ៕