ភ្នំពេញ – ចាប់តាំងតែពីសប្តាហ៍មុនមក ខេត្តកំពង់ស្ពឺ និងកំពង់ឆ្នាំង មានភ្លៀងធ្លាក់ខ្លាំងស្ទើរតែរាល់ថ្ងៃ ដែលជំរុញឱ្យអាជ្ញាធរបើកទ្វារទឹកចំនយន២នៅក្នុងខេត្តកំពង់ស្ពឺ និងទ្វារទឹកចំនួន៣នៅក្នុងខេត្តកំពង់ឆ្នាំង។
លោក សុទ្ធ គឹមកុលមុនី អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយបានថ្លែងថា ទឹកភ្លៀងបានហូរពេញអាងទឹកក្នុងខេត្តកំពង់ស្ពឺ និងកំពង់ឆ្នាំង ព្រមទាំងទំនប់៧មករា នៅស្រុកកណ្តាលស្ទឹង នៃខេត្តកណ្តាល ដែលធ្វើឱ្យលោកព្រួយបារម្ភថា ខេត្តទាំងនេះអាចនឹងរងគ្រោះដោយទឹកជំនន់ភ្លាមៗ។
លោកថា ទឹកហៀរពីអាងទឹកនឹងហូរចូលស្ទឹងព្រែកត្នោត ហើយអាចជន់លិចផ្ទះតាមដងស្ទឹង… នៅពេលដែលស្ទឹងព្រែកត្នោតពេញ នោះវានឹងធ្វើឲ្យរាជធានីភ្នំពេញលិចលង់ ព្រោះស្ទឹងព្រែកត្នោត គឺជាមូលហេតុចម្បងនៃទឹកជំនន់ភ្លាមៗនៅក្នុងខណ្ឌដង្កោ រាជធានីភ្នំពេញ។
បើតាមសេចក្តីជូនដំណឹងរបស់ក្រសួងធនធានទឹក និងឧតុនិយម នៅកំឡុងសប្តាហ៍នេះ ប្រទេសកម្ពុជានឹងទទួលរងឥទ្ធិពល នៃជ្រលងសម្ពាធទាប (ឥណ្ឌា) ដែលស្ថានភាពបែបនេះ នឹងធ្វើឱ្យបណ្តាខេត្ត និងរាជធានី ស្ទើរទូទាំងប្រទេសមានភ្លៀងធ្លាក់ពីតិចទៅច្រើន ដោយមានលាយឡំជាមួយផ្គរ រន្ទះ និងខ្យល់កន្រ្តាក់ផងដែរ៕
