ភ្នំពេញ – នៅថ្ងៃទី១៥ ខែឧសភា ខាងមុខនេះ គឺជាការចាប់ផ្តើមនូវរដូវវស្សាជារួមទូទាំងប្រទេសកម្ពុជា សម្រាប់ឆ្នាំ២០២២នេះ។
បើតាមការជូនដំណឹងរបស់ក្រសួងធនធានទឹក និងឧតុនិយម ចាប់ផ្តើមរដូវវស្សាភ្លាម ប្រទេសកម្ពុជាក៏ទទួលរងនូវឥទ្ធិពលពីខ្យល់មូសុងនិរីតីផងដែរ ដោយស្ថានភាពបែបនេះ នឹងធ្វើឱ្យ៖
តំបន់ទំនាបកណ្តាល មានសីតុណ្ណភាពពី ២៤ ទៅ៣៦អង្សាសេ, អាចមានភ្លៀងធ្លាក់ក្នុងកម្រិតពីតិចទៅមធ្យម លាយឡំទៅដោយផ្គរ រន្ទះ និងខ្យល់កន្រ្តាក់។ ទន្ទឹមនោះ កន្លែងខ្លះ ក៏អាចមានភ្លៀងខ្លាំង។
សម្រាប់តំបន់ខ្ពង់រាបវិញ សីតុណ្ហភាពអាចមានពី ២៣ ទៅ៣៥អង្សាសេ ហើយអាចមានភ្លៀងធ្លាក់ក្នុងកម្រិតពីតិចទៅច្រើន ឡាយឡំទៅដោយផ្គរ រន្ទះ និងខ្យល់កន្រ្តាក់។
ដោយឡែកតំបន់មាត់សមុទ្រ សីតុណ្ហភាពអាចមានពី ២៤ ទៅ៣៥អង្សាសេ ព្រមទាំងអាចមានភ្លៀងធ្លាក់ក្នុងកម្រិតពីតិចទៅបង្គួរ លាយឡំទៅដោយផ្គរ រន្ទះ និងខ្យល់កន្រ្តាក់។
សូមបញ្ជាក់ដែរថា បើតាមការព្យាករណ៍អាកាសធាតុលើកទី២ សម្រាប់ឆ្នាំ២០២២ រដូវវស្សាឆ្នាំនេះ នឹងមានបរិមាណទឹកភ្លៀងពីមធ្យមទៅច្រើន ព្រមទាំងអាចខ្ពស់ជាងមធ្យមភាគច្រើនឆ្នាំ និងរបាយទឹកភ្លៀងធ្លាក់រាយប៉ាយបានល្អ។ នៅដើមរដូវវស្សានេះ នឹងអាចមានភ្លៀងលាយឡំផ្គរ រន្ទះ និងខ្យល់គួចរយៈពេលខ្លីកើតមានច្រើនផងដែរ៕
