ភ្នំពេញ – បើតាមសេចក្តីជូនដំណឹងរបស់ក្រសួងពាណិជ្ជកម្មកម្ពុជា ដែលកំណត់តម្លៃលក់ប្រេងពីថ្ងៃទី១១ ដល់ថ្ងៃទី២០ ខែឧសភា ឆ្នាំ២០២២ បានបង្ហាញថា តម្លៃប្រេងសាំងធម្មតា បានហក់ឡើងដល់ ៥៥៥០រៀលក្នុងមួយលីត្រ ខណៈប្រេងម៉ាស៊ូត ឡើងរហូតដល់ ៥៨០០រៀលក្នុងមួយលីត្រ។
តម្លៃនេះ ហក់ឡើងប្រមាណ ៣០០រៀល បើធៀបនឹងតម្លៃប្រេងកាលពីដើមខែឧសភា ប៉ុន្តែក្រសួងពាណិជ្ជកម្មបានបញ្ជាក់ថា ការកំណត់តម្លៃប្រេងនេះ គឺធ្វើឡើងតាមតម្លៃឡើងចុះ នៃតម្លៃប្រេងនៅតាមទីផ្សារអន្តរជាតិ។
គួរបញ្ជាក់ថា តម្លៃប្រេងបានហក់ឡើងចាប់តាំងពីពាក់កណ្តាលខែកុម្ភៈ ឆ្នាំនេះ ។ ការឡើងថ្លៃនេះ ត្រូវគេបន្ទោសថា គឺដោយសារតែការដាក់ទណ្ឌកម្មសេដ្ឋកិច្ចទៅលើប្រទេសរុស្ស៊ី ខណៈប្រទេសនេះ គឺជាប្រទេសដែលផលិតប្រេងច្រើនជាងគេ។
ចំពោះវិបត្តិប្រេងឥន្ធនៈនេះ បើយោងតាមការចុះផ្សាយរបស់សារព័ត៌មានក្នុងតំបន់នេះ ពេលនេះប្រទេសឡាវ ដែលជាប្រទេសភូមិផងរបងជាមួយកម្ពុជា កំពុងជួបនូវវិបត្តិដោយខ្វះខាតប្រេងអស់ជាច្រើនសប្តាហ៍មកហើយ ដោយសារតែអ្នកនាំចូលប្រេងឥន្ធនៈទទួលរងការវាយប្រហារដោយការធ្លាក់ចុះនៃរូបិយបណ្ណជាតិរបស់ឡាវ (kip) ចាប់តាំងពីខែកញ្ញា រួមជាមួយនឹងទុនបម្រុងរូបិយបណ្ណបរទេសទាប និងការកើនឡើងនៃតម្លៃប្រេង ដែលជំរុញដោយសង្រ្គាមនៅអ៊ុយក្រែន៕