ភ្នំពេញ – លោក ស៊ុន ចាន់ថុល រដ្ឋមន្ត្រីក្រសួងសាធារណការ និង ដឹកជញ្ជូនបានឲ្យដឹងថា រថយន្តដែលដំណើរការដោយប្រេងឥន្ធនៈមានអត្រាពន្ធនាំចូលប្រហែល ១២៣ ភាគរយ ខណៈ រថយន្ត អគ្គិសនីអត្រាពន្ធតែ ៦៣ ភាគរយទេ។ចំនួននេះ គឺខុសគ្នាជិតពាក់កណ្តាល។
លោកបន្តថា ការប្រើប្រាស់រថយន្តអគ្គិសនីមានការសន្សំសំចៃលើការថែទាំដោយសារ គ្រឿង បង្គំរថយន្តអគ្គិសនីមានតែ ២០ មុខ ទេ ខណៈ រថយន្តប្រើប្រេងឥន្ធនៈ មានជាង ២០០០ មុខ។ ដូច្នេះ ចំណាយជួសជុលក៏អស់តិចជាង។
បើតាមលោករដ្ឋមន្រ្តី បច្ចុប្បន្ននេះមានក្រុមហ៊ុនប្រាំបួនបាននាំចូលយានយន្តអគ្គិសនី មកលក់នៅកម្ពុជា។ ទាក់ទង តម្លៃរថយន្តអគ្គិសនី វិញ តម្លៃមានថោក មានថ្លៃ ទៅតាមលក្ខណៈបច្ចេកទេសនៃរថយន្តនីមួយៗ។ មានតម្លៃ ក្រោមមួយម៉ឺនដុល្លារ និង មានដល់តម្លៃរាប់សិបម៉ឺន ក៏មានដែរតាមគុណភាពបច្ចេកទេសនៃការផលិត ។
យានយន្តអគ្គិសនី(EV)មានគុណសម្បត្តិដូចជា៖ មិនបញ្ចេញឧស្ម័នពុលក្នុងបរិយាកាស មានសំឡេងស្ងាត់ ងាយស្រួលក្នុងការថែទាំ និងសន្សំសំចៃថវិកាច្រើនក្នុងការប្រើប្រាស់
រដ្ឋមន្ត្រីក្រសួងសាធារណការ និង ដឹកជញ្ជូនបានបញ្ជាក់ថា មកដល់ពេលនេះ រថយន្តអគ្គិសនីដែល ចុះបញ្ជីនៅក្រសួងសាធារណការ បានកើនឡើងដល់ ១៤៨ គ្រឿង។ គិតត្រឹម ៥ ខែ ដើមឆ្នាំនេះមាន រថយន្ត អគ្គិសនី ៨៤ គ្រឿង បានទៅចុះ បញ្ជី ខណៈរដ្ឋាភិបាលបានដាក់គោលការណ៍ត្រឹមឆ្នាំ ២០៥០ រថយន្ត ៤០ ភាគរយ នឹង ដំណើរការដោយថាមពលអគ្គិសនី៕
