កំពង់ស្ពឺ ៖ សមត្ថកិច្ចបានឲ្យដឹងថា យ៉ាងហោច ណាស់បុរសម្នាក់បានស្លាប់ ចំណែកម្នាក់ទៀតរងរបួស គ្រាដែលបើកម៉ូតូឌុបគ្នាហើយបុកបារ៉ាសការដ្ឋាននៅលើផ្លូវល្បឿនលឿន ។ ហេតុការណ៍បានកើតឡើងនាព្រឹកថ្ងៃទី ៣១ កាក្កដា នេះ នៅត្រង់ចំណុចភូមិក្រាំងពោធ៍ ឃុំគីរីវន្ត ស្រុកភ្នំស្រួច ខេត្តកំពង់ស្ពឺ ។
ប្រភពថា ជនរងគ្រោះដល់ស្លាប់ឈ្មោះ ម៉ែន ថា ភេទប្រុស អាយុ២៣ រស់នៅភូមិកំប៉ូស្ទាវ ឃុំឃ្លាំងមាស ស្រុកបវិល ខេត្តបាត់ដំបង អ្នករួមដំណើរឈ្មោះ អៀង ឡេង ភេទប្រុស អាយុ២៣ឆ្នាំ របួសធ្ងន់ រស់នៅភូមិពេន ឃុំស្សីស្រុក ស្រុកពាមជរ៍ ខេត្តព្រៃវែង ជិះម៉ូតូ០១គ្រឿងម៉ាក SUZUKI Viva ពណ៌ខ្មៅ ពាក់សស្លាកលេខ កណ្ដាល 1G-7916 ។
ទីតាំងបង្កគ្រោះថ្នាក់ចរាចរណ៍
តាមសាក្សីថា មុនពេលកើតហេតុ ម៉ូតូខាងលើបើកបរពីទិសខាងលិចទៅទិសខាងកើត លុះមកដល់ចំណុចកើតហេតុ ក៍បានបុកបារ៉ាស់ដែលជាចំណុចទប់ស្កាត់ការធ្វើដំណើរឆ្លងកាត់ ចេញ-ចូលក្នុងការដ្ឋានសាងសង់ផ្លូវល្បឿនលឿន តែម្ដង ៕
