(ភ្នំពេញ) – ក្រសួងការងារ និងបណ្តុះបណ្តាលវិជ្ជាជីវៈ នៅថ្ងៃនេះបានធ្វើការព្រមានចំពោះកម្មករ និយោជិត ដែលឈប់សម្រាកក្នុងអំឡុងពេលបុណ្យចូលឆ្នាំ ហើយពេលចូលបម្រើការងារវិញ ដោយមិនព្រមអនុវត្តនូវវិធានការចត្តាឡីស័ក ដែលក្រសួងដាក់ចេញ អាចនឹងត្រូវបញ្ឈប់ពីការងារ ដោយមិនមានការទូទាត់អត្ថប្រយោជន៍ពីនិយោជកឡើយ។
កម្មករនិយោជិតដែលមិនបានអនុវត្តវិធានការចត្តាឡីស័ក អាចនឹងត្រូវបញ្ឈប់ពីការងារ
វិធានការចត្តាឡីស័ក ដែលក្រសួងដាក់ចេញនោះរួមមាន៖
១. បង្ហាញខ្លួននៅតាមរោងចក្រ និងផ្តល់ព័ត៌មានចាំបាច់ជាដាច់ខាត តាមការកំណត់របស់ក្រសួងការងារ ដើម្បីរដ្ឋបាលរោងចក្រចុះវត្តមាន និងសហការអនុវត្តវិធានការចត្តាឡីស័ករបស់ក្រសួងការងារ។
២. ទៅពិនិត្យសុខភាពនៅមណ្ឌលត្រួតពិនិត្យសុខភាព តាមការណែនាំរបស់រដ្ឋបាលរោងចក្រ ស្របតាមការកំណត់របស់អធិការការងារ។
៣. អនុវត្តវិធានការចត្តាឡីស័កនៅតាមមណ្ឌលដែលបានកំណត់ ឬកន្លែងស្នាក់នៅរបស់ខ្លួនរយៈពេល១៤ថ្ងៃ តាមការកំណត់របស់ក្រុមគ្រូពេទ្យ ឬអាជ្ញាធរមានសមត្ថកិច្ច។
៤. រក្សាទុក និងបង្ហាញលិខិតបញ្ជាក់ស្ថានភាពសុខភាពរបស់ខ្លួន ដែលចេញដោយក្រុមគ្រូពេទ្យ ដើម្បីបង្ហាញរដ្ឋបាលរោងចក្រ និងម្ចាស់ផ្ទះ។
៥. រាយការណ៍ជូនរដ្ឋបាលរោងចក្រតាមទូរស័ព្ទ អំពីស្ថានភាពសុខភាពរបស់ខ្លួនរៀងរាល់ម៉ោង៨ព្រឹក ដើម្បីរដ្ឋបាលរោងចក្ររាយការណ៍បន្ត ជូនរដ្ឋបាលគ្រូពេទ្យនៃក្រសួងការងារ។
៦. ទាក់ទងទៅក្រសួងសុខាភិបាល តាមរយៈលេខ១១៥ ឬលេខ ០១២ ៨២៥ ៤២៤ ឬ ០១២ ៩៥៨ ១៧៩ បើមានអាការសង្ស័យណាមួយ ក្នុងអំឡុងពេលធ្វើចត្តាឡីស័ក នៅកន្លែងស្នាក់នៅរយៈពេល១៤ថ្ងៃ។
៧. ពាក់ម៉ាស់ជាដាច់ខាតនៅកន្លែងបម្រើការងារ បន្ទាប់ពីបញ្ចប់ការធ្វើចត្តាឡីស័កនៅផ្ទះ រយៈពេល១៤ថ្ងៃ៕
