បាងកក : យុវតីវ័យ២៥ឆ្នាំម្នាក់ត្រូវបានតុលាការថៃកាលពីថ្ងៃទី១២កញ្ញា កាត់ទោសឲ្យជាប់ពន្ធនាគារ ៣ឆ្នាំ ក្រោយមកសម្របសម្រួលមកត្រឹម២ឆ្នាំ ពីបទប្រមាថរាជវង្សថៃ គ្រាដែលនាងពាក់អាវស្រដៀងទៅនឹងមហេ សីស្ដេច ។
មហេសីថៃ Suthida តែងគ្រងសំលៀកបំពាក់សូត្រ ពណ៌ផ្កាឈូកនៅពេលចូលរួមក្នុងកម្មវិធីសាធារណៈ។ ហើយកាលអំឡុងឆ្នាំ២០២០ កញ្ញា Jatuporn ‘New’ Saeoueng បានពាក់អាវសូត្រពណ៌ផ្កាឈូក ដែលស្រដៀងនឹងឈុតរបស់មហេសីដែរ។ ដែលវាត្រូវបានគេចាត់ទុកថា ជាការប្រមាថដល់រាជវង្ស ។
ជាការកត់សម្គាល់តាំងពីមហាក្សត្រ មហា វជិរាលង្ករណ៍ ឡើងកាន់តំណែងនៅក្នុងឆ្នាំ២០១៩ មក អាជ្ញា ធរថៃបានអនុវត្តច្បាប់ការពារមហាក្សត្រយ៉ាងខ្លាំង។នៅក្នុងឆ្នាំ២០២១ អតីតមន្រ្តីរាជការថៃមួយរូប ត្រូវបានកាត់ទោសឱ្យជាប់ពន្ធនាគាររយៈពេល ៤៣ឆ្នាំ ក្រោមហេតុផលប្រមាថរាជវង្សថៃនៅលើបណ្តាញសង្គម Facebook និង YouTube៕