(ភ្នំពេញ) – ក្រសួងការងារ និងបណ្តុះបណ្តាលវិជ្ជាជីវៈបានឲ្យដឹងថា ក្នុងរយៈពេល២ថ្ងៃមកនេះ ពោលគឺនៅថ្ងៃទី២០ និងថ្ងៃទី២១ ខែមេសា ឆ្នាំ២០២០ មានកម្មករសរុបចំនួន ១៤២៣នាក់ ត្រូវបានពិនិត្យសុខភាព និងធ្វើចត្តាឡីស័ក ក្រោយពីពួកគេបានឈប់សម្រាកអំឡុងពេលបុណ្យចូលឆ្នាំ ហើយត្រឡប់មកចូលបម្រើការងារវិញ។
តាមការបញ្ជាក់របស់ក្រសួងការងារ នៅថ្ងៃទី២០ ខែមេសា ឆ្នាំ២០២០ គិតត្រឹមម៉ោង៦ល្ងាច មានកម្មករមកត្រួតពិនិត្យសុខភាពចំនួន ១០១៨នាក់ ក្នុងនោះដាក់ឱ្យធ្វើចត្តាឡីស័កនៅផ្ទះ១៤ថ្ងៃ ចំនួន៩៥៩នាក់ ដាក់ឱ្យស្នាក់នៅមណ្ឌលចត្តាឡីស័កកម្រិត១ (វិទ្យាល័យជម្ពូវ័ន) ចំនួន៣៨នាក់ និងយកសំណាកទៅពិសោធន៍បន្តចំនួន១៨នាក់ និងដាក់ឱ្យស្នាក់នៅមណ្ឌលចត្តាឡីស័ក កម្រិត២ (វិទ្យាល័យជម្ពូវ័ន) ចំនួន២១នាក់។
សម្រាប់ថ្ងៃទី២១ ខែមេសា ឆ្នាំ២០២០ គិតត្រឹមម៉ោង១១៖០០នាទីព្រឹក មានកម្មកររោងចក្រមកត្រួតពិនិត្យសុខភាពចំនួន ៤០៥នាក់ក្នុងនោះ ដាក់ឱ្យធ្វើចត្តាឡីស័កនៅផ្ទះ១៤ថ្ងៃ ចំនួន៣៧៦នាក់ ដាក់ឱ្យស្នាក់នៅមណ្ឌលចត្តាឡីស័កកម្រិត១ ចំនួន៦នាក់ និងដាក់ឱ្យស្នាក់នៅមណ្ឌលចត្តាឡីស័កកម្រិត២ ចំនួន ២៣នាក់៕
