បន្ទាយមានជ័យ : រដ្ឋមន្ត្រីក្រសួងមហាផ្ទៃ លោក ស សុខា កាលព្រឹកថ្ងៃទី១៨ ធ្នូនេះ ពីទីក្រុងប៉ោយប៉ែតបានថ្លែងថា នឹងបណ្ដេញចេញពីក្របខណ្ឌបើរកឃើញថា មន្ត្រីនគរបាលណាមានផ្ទុកសារធាតុញៀន។
លោករដ្ឋមន្ត្រីបានថ្លែងដូច្នេះថា «សូមប្រកាសតែម្ដង គឺគ្រប់មន្ដ្រីក្រោមឱវាទ ពិសេសកងកម្លាំងប្រដាប់អាវុធចំណុះក្រសួងមហាផ្ទៃ ឲ្យតែធ្វើតេស្ដឃើញសារធាតុញៀន មិនអាចអនុញ្ញាតឲ្យនៅក្នុងក្របខណ្ឌនគរបាលជាតិនោះទេ។ បើមិនយកពេលវេលានេះដើម្បីសម្អាតផ្ទះយើងទេ យើងអត់មានពេលសម្អាតទៀតទេ។ ចំពោះមន្ត្រីក្របខណ្ឌស៊ីវិល មិនទាន់មានការណែនាំជារួមទេ»។
ក្នុងនោះលោក ស សុខា ក៏បានព្រមានជាប្រយោលផងដែរថា ចំពោះជនទាំងឡាយណាដែលពាក់ព័ន្ធជាមួយបទល្មើសគ្រឿងញៀន សូមដកខ្លួនចេញឲ្យឆ្ងាយ ខណៈអ្នកដែលដឹងថា ខ្លួនមានសារធាតុញៀន ក៏ត្រូវស្វែងរកវិធីសាស្ដ្រដើម្បីផ្ដាច់ចោល៕