វ៉ាស៊ីនតោន ,អាមេរិក ៖ ប្រភពពីបណ្ដាញព័ត៌មានរុស្ស៊ី sputnik នាថ្ងៃទី២៣ ខែមេសា នេះថា ប្រធានាធិបតីអាមេរិក លោកដូណាល់ ត្រាំ បានថ្លែងតាមប្រព័ន្ធទំនាក់ទំនង Twitterថា លោកបានបើកភ្លើងខៀវឲ្យដល់កងកម្លាំងជើងទឹកអាមេរិក វាយប្រហារ ពន្លិចទូកយោធាអ៊ីរ៉ង់ធុនតូចណា បើសិនទូកយោធាទាំងនោះ ចាប់ផ្តើមយារយីដល់នាវាយោធាអាមេរិក ។
អ្នកនាំពាក្យមួយរូបរបស់កងកម្លាំងប្រដាប់អាវុធអ៊ីរ៉ង់បានឆ្លើយតបការថ្លែងរបស់ប្រធានាធិបតីអាមេរិក ដោយប្រាប់ទីក្រុងវ៉ាស៊ីនតោន ថា យោធាអាមេរិកគួរតែផ្តោតការយកចិត្តទុកដាក់ត្រឹមការ ការពារខ្លួនពី មេរោគកូរ៉ូណាបានហើយ។
អ្នកនាំពាក្យនិយាយថា «ថ្ងៃនេះ ជំនួសឲ្យការសម្លុតគំរាមកំហែងដទៃផ្សេងទៀត អាមេរិក គួរតែខិតខំឲ្យអស់ពីលទ្ធភាព ដើម្បីសង្គ្រោះចំនួនកងកម្លាំងរបស់ខ្លួនដែលឆ្លងវីរុស Covid-19នោះទៅ»។
កងកម្លាំងជើងទឹកអាមេរិកបានអះអាងច្រើនលើកទៅលើអ្វីដែលហៅថា ទូកល្បឿនលឿនអ៊ីរ៉ង់បានចូលជិតចំណុចគ្រោះថ្នាក់ នៃវានាពិឃាតរបស់ពួកគេ ហើយដែលបាននិងកំពុងល្បាតនៅតំបន់ឈូងសមុទ្រ ពែក្ស ( Persian) ។ កាលពីថ្ងៃទី១៥ ខែមេសា យោធាអាមេរិកបានរាយការណ៍ថា ក្រុមទូកល្បឿនលឿនអ៊ីរ៉ង់ចំនួន១១គ្រឿង ដែលមកពីកងកម្លាំងឆ្មាំការពារបដិវត្តន៍អ៊ីស្លាមអ៊ីរ៉ង់ (IRGC) បានយារយីនាវាចម្បាំងអាមេរិក ដែលស្ថិតនៅលើដែនសមុទ្រភាគខាងជើងច្រកពែក្ស ។
មានការគិតថា ផ្ដើមពីចំណុចនេះ អាមេរិក និងអ៊ីរ៉ង អាចនឹងឈានទៅរកភាពតានតឹងជាថ្មី បន្ទាប់ពីទ័ពអាកាសអាមេរិកបានវាយប្រហារសម្លាប់មេទ័ពកំពូលអ៊ីរ៉ង់ ឈ្មោះ Aasem Soleimani នៅអ៊ីរ៉ាក់កាលពីអំឡុងខែមករា ឆ្នាំ២០២០ នោះ ៕ កែវ រស្មី
