(កណ្តាល) – ក្មេងប្រុសស្រី២នាក់ដែលត្រូវជាបងប្អូនជីដូនមួយនឹងគ្នាបានលង់ទឹកស្លាប់គួរឲ្យសង្វេគ កាលពីរសៀលថ្ងៃទី២២ ខែឧសភា ឆ្នាំ២០២០ នៅចំនុចត្រពាំងអង្គ ស្ថិតនៅភូមិតានូ ឃុំស្អាងភ្នំ ស្រុកស្អាង ខេត្តកណ្តាល ក្រោយពីពួកគេបានចុះលេងទឹក ពេលតាមឪពុកមកបង់សំណាញ់។
ជនរងគ្រោះត្រូវបានបញ្ជាក់ថា ក្មេងទី១ ឈ្មោះ ខុំ វ៉ាន់ ភេទប្រុស អាយុ៩ឆ្នាំ មានឪពុកឈ្មោះ ញ៉ សុខុំ អាយុ៣៦ ឆ្នាំ និងម្ដាយឈ្មោះ នាង ជ្រឿន អាយុ៣១ ឆ្នាំ។ ចំណែកក្មេងទី២ឈ្មោះ ធូ ណារី ភេទស្រី អាយុ៩ ឆ្នាំ មានឪពុក ឈ្មោះ ធី ចាន់ធូ អាយុ៣១ឆ្នាំ និងម្ដាយឈ្មោះ ញ៉ គៀង អាយុ៣១ឆ្នាំ។
តាមសមត្ថកិច្ចបានឲ្យដឹងនៅវេលាកើតហេតុថ្ងៃទី២២ ខែឧសភា ឆ្នាំ២០២០ វេលាម៉ោង១៦និង១៤នាទី ឈ្មោះ ញ៉ សុខុំ ឪពុកបង្កើតរបស់ជនរងគ្រោះ ឈ្មោះ ខុំ វ៉ាន់ បានយកសំណាញ់ទៅបង់ត្រីនៅត្រពាំងអង្គដោយបាននាំកូនប្រុស និងក្មួយស្រីបង្កើតទៅតាមពេលដល់ត្រពាំងអង្គឪពុកបានបង់សំណាញ់នៅខាងជើងត្រពាំងអង្គ(មានជំរៅប្រហែល០៣ម៉ែត្រ)កូនប្រុសនិងក្មួយស្រីនាំគ្នាលេងទឹកនៅខាងត្បូងត្រពាំងអង្គ។
លុះកំពុងលេងទឹកទាំងពីរនាក់បងប្អូនមិនចេះហែលទឹកផង ហើយដោយឪពុកមិនបានចាប់អារម្មណ៍ផងកូនបានស្រែកហៅឪពុកឲ្យជួយ ឪពុកបានឮក៏ក្រឡេកមើលទៅខាងត្បូងត្រពាំងឃើញកូន ក៏បានទំលាក់សំណាញ់ចុះរត់មកជួយកូន ប៉ុន្តែទំរាំមកដល់ឪពុកទន់ជើងស្លុតស្មារតីបានត្រឹមឈរមើលហើយស្រែកយំឲ្យគេជួយកូនប្រុស និងក្មួយស្រី។
ក្រោយមកក៏មានប្រជាពលរដ្ឋនៅក្បែរនោះរត់មកជួយ ហើយទំរាំរកឃើញប្រហែលជាកន្លះម៉ោងទើបរកឃើញក្មេងទាំងពីរនាក់នោះបានលង់ទឹកស្លាប់បាត់អស់ហើយ៕