ក្រសួងសុខាភិបាលកម្ពុជាបានប្រកាសនៅព្រឹកថ្ងៃអាទិត្យនេះថា គេបានរកឃើញករណីជំងឺកូវីដ១៩ចំនួន២ករណីបន្ថែមទៀត ដែលធ្វើឲ្យករណីជំងឺកូវីដនៅកម្ពុជាកើនដល់ ១៤១នាក់។
ករណីថ្មី២ដែលបានរកឃើញនេះ គឺបុរសជនជាតិខ្មែរអាយុ ២៣ឆ្នាំ មានអាយ័យដ្ឋាននៅស្រុកក្រូចឆ្មា ខេត្តត្បូងឃ្មុំ និងបុរសជនជាតិខ្មែរអាយុ ១៥ឆ្នាំ មានអាស័យដ្ឋាននៅឃុំដើមមាន ខេត្តកណ្តាល។ ពួកគេជាអ្នកដំណើរវិលត្រឡប់មកពីប្រទេសម៉ាឡេស៊ីតាមជើងហោះហើរត្រង់ បានមកដល់កម្ពុជានៅថ្ងៃទី២៦ ខែមិថុនា ឆ្នាំ២០២០។
បច្ចុប្បន្នពួកគេត្រូវបានដាក់ឲ្យសម្រាកព្យាបាលនៅមណ្ឌលសុខភាពចាក់អង្រែ រាជធានីភ្នំពេញ។
បើតាមការបញ្ជាក់របស់ក្រសួងសុខាភិបាលបានឲ្យដឹងថា ជើងហោះហើរដែលពួកគេបានជិះមកនោះ គឺមានអ្នកដំណើរសរុបចំនួន ១០៧នាក់ ក្នុងនោះមានជនជាតិខ្មែរ ១០៥នាក់ និងជនជាតិម៉ាឡេស៊ី ២នាក់។
សម្រាប់អ្នកដំណើរជនជាតិខ្មែរចំនួន ១០៣នាក់ មានលទ្ធផលតេស្តអវិជ្ជមានវីរុសកូវីដ១៩ ហើយត្រូវបានបន្តស្នាក់នៅមណ្ឌលចត្តាឡីស័កជម្ពូវ័ន១ រាជធានីភ្នំពេញ ដើម្បីរង់ចាំការដឹកជញ្ជូនទៅបន្តធ្វើចត្តាឡីស័កនៅតាមបណ្តាខេត្តដែលពួកគាត់រស់នៅរៀងៗខ្លួន, ចំណែកបុរសជនជាតិម៉ាឡេស៊ី ២នាក់ បន្តស្នាក់នៅសណ្ឋាគារមួយក្នុងទីក្រុងភ្នំពេញ ធ្វើចត្តាឡីស័កចំនួន ១៤ថ្ងៃ ដើម្បីតាមដានសុខភាពបន្តទៀត៕
