បន្ទាយមានជ័យ៖ យោងតាមសេចក្តីរាយការណ៍បានឲ្យដឹងថា កាលពីថ្ងៃទី២៨ ខែមិថុនា ឆ្នាំ២០២០ តម្រួតខេត្តស្រះកែវ នៃប្រទេសថៃ បានឃាត់ខ្លួនពលករខ្មែរចំនួន ១៣នាក់ ក្រោយលួចឆ្លងដែនចូលទៅកាន់ប្រទេសថៃដើម្បីរកការងារធ្វើដោយខុសច្បាប់។
ពលករខ្មែរទាំងនោះបាននិយាយថា ពួកគេបាននាំគ្នាដើរឆ្លងដែន តាមច្រករបៀងក្នុងឃុំបានឡែម ស្រុកពោងណាំរ៉ន ខេត្តច័ន្ទបុរី និងចំណយឲ្យរថយន្តក្នុងម្នាក់ ៣០០០បាត ដើម្បីឲ្យជូនទៅរកការងារ នៅក្នុងខេត្តសមុទ្រប្រាកាន។
បច្ចុប្បន្នពលករខ្មែរទាំងអស់ ត្រូវបានកម្លាំងតម្រួតថៃ ប្រគល់ទៅឲ្យមន្ត្រីជំនាញនាំយកទៅសាកសួរបន្ត ដើម្បីកសាងសំណុំរឿងបញ្ជូនតាមផ្លូវច្បាប់ ពាក់ព័ន្ធនឹងការឆ្លងដែនចូល ដោយមិនស្របច្បាប់ ទៅធ្វើការ ឬស្នាក់នៅក្នុងប្រទេសថៃ៕